Sarga 29: Sītā Insists on Following

कृतादेशा भविष्यामि गमिष्यामि सह त्वया। कालश्चायं समुत्पन्नः सत्यवाग्भवतु द्विजः ।।2.29.11।।

वनवासे हि जानामि दुःखानि बहुधा किल। प्राप्यन्ते नियतं वीर पुरुषैरकृतात्मभिः ।।2.29.12।।

कन्यया च पितुर्गेहे वनवासः श्रुतो मया। भिक्षिण्याः साधुवृत्ताया मम मातुरिहाग्रतः ।।2.29.13।।

प्रसादितश्च वै पूर्वं त्वं वै बहुविधं प्रभो। गमनं वनवासस्य काङ्क्षितं हि सह त्वया ।।2.29.14।।

कृतक्षणाऽहं भद्रं ते गमनं प्रति राघव। वनवासस्य शूरस्य चर्या हि मम रोचते ।।2.29.15।।

शुद्धात्मन्प्रेमभावाद्धि भविष्यामि विकल्मषा। भर्तारमनुगच्छन्ती भर्ता हि मम दैवतम् ।।2.29.16।।

प्रेत्यभावेऽपि कल्याणः सङ्गमो मे सह त्वया। श्रुतिर्हि श्रूयते पुण्या ब्राह्मणानां तपस्विनाम् ।।2.29.17।।

इह लोके च पितृभिर्या स्त्री यस्य महामते। अद्भिर्दत्ता स्वधर्मेण प्रेत्यभावेऽपि तस्य सा ।।2.29.18।।

एवमस्मात्स्वकां नारीं सुवृत्तां हि पतिव्रताम्। नाभिरोचयसे नेतुं त्वं मां केनेह हेतुना ।।2.29.19।।

भक्तां पतिव्रतां दीनां मां समां सुखदुःखयोः। नेतुमर्हसि काकुत्स्थ समानसुखदुःखिनीम् ।।2.29.20।।