Sarga 15: Sumantra Sent for Rāma

ते तु तां रजनीमुष्य ब्राह्मणा वेदपारगाः। उपतस्थुरुपस्थानं सह राजपुरोहिताः ।।2.15.1।।

अमात्या बलमुख्याश्च मुख्या ये निगमस्य च। राघवस्याभिषेकार्थे प्रीयमाणास्तु सङ्गताः ।।2.15.2।।

उदिते विमले सूर्ये पुष्ये चाभ्यागतेऽहनि। लग्ने कर्कटके प्राप्ते जन्म रामस्य च स्थिते ।।2.15.3।।

अभिषेकाय रामस्य द्विजेन्द्रैरुपकल्पितम्। काञ्चना जलकुम्भाश्च भद्रपीठं स्वलङ्कृतम् ।।2.15.4।।

रथश्च सम्यगास्तीर्णो भास्वता व्याघ्रचर्मणा। गङ्गायमुनयोः पुण्यात्सङ्गमादाहृतं जलम् ।।2.15.5।।

याश्चान्याः सरितः पुण्या ह्रदाः कूपाः सरांसि च। प्राग्वाहाश्चोर्ध्ववाहाश्च तिर्यग्वाहाः समाहिताः ।।2.15.6।।

ताभ्यश्चैवाहृतं तोयं समुद्रेभ्यश्च सर्वशः। सलाजाः क्षीरिभिश्छन्नाः घटाः काञ्चनराजताः ।।2.15.7।।

पद्मोत्पलयुता भान्ति पूर्णाः परमवारिणा। क्षौद्रं दधि घृतं लाजाः दर्भाः सुमनसः पयः ।।2.15.8।।

वेश्याश्चैव शुभाचाराः सर्वाभरणभूषिताः। चन्द्रांशुविकचप्रख्यं काञ्चनं रत्नभुषितम् ।।2.15.9।।

सज्जं तिष्ठति रामस्य वालव्यजनमुत्तमम्। चन्द्रमण्डलसङ्काशमातपत्रं च पाण्डरम् ।।2.15.10।।