Sarga 88: Looking at the Bed

तच्छ्रुत्वा निपुणं सर्वं भरतः सह मन्त्रिभिः । इङ्गुदीमूलमागम्य रामशय्यामवेक्ष्य ताम् ।।2.88.1।।

अब्रवीज्जननीः सर्वा इह तेन महात्मना । शर्वरी शयिता भूमौ इदमस्य विमर्दितम् ।।2.88.2।।

महाभागकुलीनेन महाभागेन धीमता । जातो दशरथेनोर्व्यां न रामः स्वप्तुमर्हति ।।2.88.3।।

अजिनोत्तरसंस्तीर्णे वरास्तरणसञ्चये । शयित्वा पुरुषव्याघ्रः कथं शेते महीतले ।।2.88.4।।

प्रासादाग्रविमानेषु वलभीषु च सर्वदा । हैमराजतभौमेषु वरास्तरणशालिषु ।।2.88.5।।

पुष्पसञ्चयचित्रेषु चन्दनागरुगन्धिषु । पाण्डराभ्रप्रकाशेषु शुकसङ्घरुतेषु च ।।2.88.6।।

प्रासादवरवर्येषु शीतवत्सु सुगन्धिषु । उषित्वा मेरुकल्पेषु कृतकाञ्चनभित्तिषु ।।2.88.7।।

गीतवादित्रनिर्घोषैर्वराभरणनिस्स्वनैः । मृदङ्गवरशब्दैश्च सततं प्रतिबोधितः ।।2.88.8।।

वन्दिभिर्वन्दितः काले बहुभिः सूतमागधैः । गाथाभिरनुरूपाभिः स्तुतिभिश्च परन्तपः ।।2.88.9।।

अश्रद्धेयमिदं लोके न सत्यं प्रतिभाति मा । मुह्यते खलु मे भावः स्वप्नोऽयमिति मे मतिः ।।2.88.10।।