Sarga 54: Arrival at Bharadvāja's Hermitage

ते तु तस्मिन् महावृक्षौषित्वा रजनीं शिवाम् । विमलेऽभ्युदिते सूर्ये तस्माद्देशात् प्रतस्थिरे ।।2.54.1।।

यत्र भागीरथीं गङ्गां यमुनाऽभिप्रवर्तते । जग्मुस्तं देशमुद्दिश्य विगाह्य सुमहद्वनम् ।।2.54.2।।

ते भूमिभागान् विविधान् देशांश्चापि मनोरमान् । अदृष्टपूर्वान् पश्यन्तस्तत्र तत्र यशस्विनः ।।2.54.3।।

यथाक्षेमेण गच्छन् सः पश्यंश्च विविधान् द्रुमान् । निवृत्तमात्रे दिवसे रामः सौमित्रिमब्रवीत् ।।2.54.4।।

प्रयागमभितः पश्य सौमित्रे धूममुन्नतम् । अग्नेर्भगवतः केतुं मन्ये सन्निहितः मुनिः ।।2.54.5।।

नूनं प्राप्तास्म सम्भेदं गङ्गा यमुनयोर्वयम् । तथा हि श्रूयते शब्दः वारिणो वारिघट्टितः ।।2.54.6।।

दारूणि परिभिन्नानि वनजैः उपजीविभिः । भरद्वाजाश्रमे चैते दृश्यन्ते विविधा द्रुमाः ।।2.54.7।।

धन्विनौ तौ सुखं गत्वा लम्बमाने दिवाकरे । गङ्गायमुनयोः सन्धौ प्रापतुर्निलयं मुनेः ।।2.54.8।।

रामस्त्वाश्रममासाद्य त्रासयन् मृगपक्षिणः । गत्वा मुहूर्तमध्वानं भरद्वाजमुपागमत् ।।2.54.9।।

ततस्त्वाश्रममासाद्य मुनेर्दर्शनकाङ्क्षिणौ । सीतयाऽनुगतौ वीरौ दूरादेवावतस्थतुः ।।2.54.10।।