Sarga 65: Wailing in the Inner Palace

अथ रात्र्यां व्यतीतायां प्रातरेवापरेऽहनि । वन्दिनः पर्युपातिष्ठन् तत्पार्थिवनिवेशनम् ।।2.65.1।।

सूताः परमसंस्काराः मङ्गलाश्चोत्तमश्रुताः । गायकाः स्तुतिशीलाश्च निगदन्तः पृथक् पृथक् ।।2.65.2।।

राजानं स्तुवतां तेषामुदात्ताभिहिताशिषाम् । प्रासादाभोगविस्तीर्णः स्तुतिशब्दो ह्यवर्तत ।।2.65.3।।

ततस्तु स्तुवतां तेषां सूतानां पाणिवादकाः । अपदानान्युदाहृत्य पाणिवादा नवादयन् ।।2.65.4।।

तेन शब्देन विहगाः प्रतिबुद्धा विसस्वनुः । शाखास्थाः पञ्जरस्थाश्च ये राजकुलगोचराः ।।2.65.5।।

व्याहृताः पुण्यशब्दाश्च वीणानां चापि निस्स्वनाः । आशीर्गेयं च गाथानां पूरयामास वेश्म तत् ।।2.65.6।।

ततः शुचिसमाचाराः पर्युपस्थानकोविदाः । स्त्रीवर्षवरभूयिष्ठाः उपतस्थुर्यथापुरम् ।।2.65.7।।

हरिचन्दनसम्पृक्तमुदकं काञ्चनैः घटैः । आनिन्युः स्नानशिक्षाज्ञा यथाकालं यथाविधि ।।2.65.8।।

मङ्गलालम्भनीयानि प्राशनीयान्युपस्करान् । उपनिन्युस्तथाप्यन्याः कुमारीबहुलाः स्त्रियः ।।2.65.9।।

सर्वलक्षणसम्पन्नं सर्वं विधिवदर्चितम् । सर्वं सुगुणलक्ष्मीवत्तद्भभूवाभिहारिकम् ।।2.65.10।।