Sarga 11: Kaikeyī Insists on Two Boons

सा तदर्थमना देवी तमभिप्रायमागतम्। निर्माध्यस्थ्याच्च हर्षाच्च बभाषे दुर्वचं वचः ।।2.11.11।।

तेन वाक्येन संहृष्टा तमभिप्रायमागतम्। व्याजहार महाघोरमभ्यागतमिवान्तकम् ।।2.11.12।।

यथा क्रमेण शपसि वरं मम ददासि च। तच्छृण्वन्तु त्रयस्त्रिंशद्देवाः साग्निपुरोगमाः ।।2.11.13।।

चन्द्रादित्यौ नभश्चैव ग्रहा रात्र्यहनी दिशः। जगच्च पृथिवी चेयं सगन्धर्वा सराक्षसा ।।2.11.14।।

निशाचराणि भूतानि गृहेषु गृहदेवताः। यानि चान्यानि भूतानि जानीयुर्भाषितं तव ।।2.11.15।।

सत्यसन्धो महातेजाः धर्मज्ञः सुसमाहितः। वरं मम ददात्येष तन्मे शृण्वन्तु देवताः ।।2.11.16।।

इति देवी महेष्वासं परिगृह्याभिशस्य च। ततः परमुवाचेदं वरदं काममोहितम् ।।2.11.17।।

स्मर राजन्पुरा वृत्तं तस्मिन् दैवासुरे रणे। तत्र चाच्यावयच्छत्रुस्तव जीवितमन्तरा ।।2.11.18।।

तत्र चापि मया देव यत्त्वं समभिरक्षितः। जाग्रत्या यतमानायास्ततो मे प्राददा वरौ ।।2.11.19।।

तौ तु दत्तौ वरौ देव निक्षेपौ मृगयाम्यहम्। तथैव पृथिवीपाल सकाशे सत्यसङ्गर ।।2.11.20।।