Sarga 113: The Sandals Received

ततस्ते यमुनां दिव्यां नदीं तीर्त्वोर्मिमालिनीम् । ददृशुस्तां पुनः सर्वे गङ्गां शुभजलां नदीम् ।।2.113.21।।

तां रम्यजलसम्पूर्णां सन्तीर्य सहबान्धवः । शृङ्गिबेरपुरं रम्यं प्रविवेश ससैनिकः ।।2.113.22।।

शृङ्गिबेरपुराद्भूयस्त्वयोध्यां सन्ददर्श ह । अयोध्यां च ततो दृष्ट्वा पित्रा भ्रात्रा विवर्जिताम् ।।2.113.23।।

भरतो दुःखसन्तप्तः सारथिं चेदमब्रवीत् । सारथे पश्य विध्वस्ता सायोध्या न प्रकाशते । निराकारा निरानन्दा दीना प्रतिहतस्वरा ।।2.113.24।।