Sarga 8: Mantharā's Whispering

एवं चेत्त्वं सहास्माभिस्तस्याः प्रेष्या भविष्यसि। पुत्रश्च तव रामस्य प्रेष्यभावं गमिष्यति ।।2.8.11।।

हृष्टाः खलु भविष्यन्ति रामस्य परमाः स्त्रियः। अप्रहृष्टा भविष्यन्ति स्नुषास्ते भरतक्षये ।।2.8.12।।

तां दृष्ट्वा परमप्रीतां ब्रुवन्तीं मन्थरां ततः। रामस्यैव गुणान्देवी कैकेयी प्रशशंस ह ।।2.8.13।।

धर्मज्ञो गुरुभिर्दान्तः कृतज्ञः सत्यवाक्छुचिः। रामो राज्ञः सुतो ज्येष्ठो यौवराज्यमतोऽर्हति ।।2.8.14।।

भ्रातॄन्भृत्यांश्च दीर्घायुः पितृवत्पालयिष्यति। सन्तप्यसे कथं कुब्जे श्रुत्वा रामाभिषेचनम् ।।2.8.15।।

भरतश्चापि रामस्य ध्रुवं वर्षशतात्परम्। पितृपैतामहं राज्यं प्राप्नुयात्पुरुषर्षभः ।।2.8.16।।

सा त्वमभ्युदये प्राप्ते वर्तमाने च मन्थरे। भविष्यति च कल्याणे किमर्थं परितप्यसे ।।2.8.17।।

यथा मे भरतो मान्यस्तथा भूयोऽपि राघावः। कौसल्यातोऽतिरिक्तं च सोऽनुशुश्रूषते हि माम् ।।2.8.18।।

राज्यं यदि हि रामस्य भरतस्यापि तत्तथा। मन्यते हि यथाऽत्मानं तथा भ्रातॄंस्तु राघवः ।।2.8.19।।

कैकेय्या वचनं श्रुत्वा मन्थरा भृशदुःखिता। दीर्घमुष्णं विनिश्वस्य कैकेयीमिदमब्रवीत् ।।2.8.20।।