Sarga 35: Sumantra Rebukes Kaikeyī

न हि मिथ्या प्रतिज्ञातं करिष्यति तवानघः । श्रीमान्दशरथो राजा देवि राजीवलोचनः ।।2.35.31।।

ज्येष्ठो वदान्यः कर्मण्यः स्वधर्मस्याभिरक्षिता । रक्षिता जीवलोकस्य ब्रूहि रामोऽभिषिच्यताम् ।।2.35.32।।

परिवादो हि ते देवि महांल्लोके चरिष्यति । यदि रामो वनं याति विहाय पितरं नृपम् ।।2.35.33।।

स राज्यं राघवः पातु भव त्वं विगतज्वरा । न हि ते राघवादन्यः क्षमः पुरवरे वसेत् ।।2.35.34।।

रामे हि यौवराज्यस्थे राजा दशरथो वनम् । प्रवेक्ष्यति महेष्वासः पूर्ववृत्तमनुस्मरन् ।।2.35.35।।

इति सान्त्वैश्च तीक्ष्णैश्च कैकेयीं राजसंसदि । सुमन्त्रः क्षोभयामास भूय एव कृताञ्जलिः ।।2.35.36।।

नैव सा क्षुभ्यते देवी न च स्म परिदूयते । न चास्या मुखवर्णस्य विक्रिया लक्ष्यते तदा ।।2.35.37।।