Sarga 74: Bharata Upbraids Kaikeyī

आनाययित्वा तनयं कौसल्याया महाबलम् । स्वयमेव प्रवेक्ष्यामि वनं मुनिनिषेवितम् ।।2.74.31।।

न ह्यहं पापसङ्कल्पे पापे पापं त्वया कृतम् । शक्तो धारयितुं पौरैरश्रुकण्ठैर्निरीक्षितः ।।2.74.32।।

सा त्वमग्निं प्रविश वा स्वयं वा दण्डकान्विश । रज्जुं बधान वा कण्ठे न हि तेऽन्यत्परायणम् ।।2.74.33।।

अहमप्यवनिं प्राप्ते रामे सत्यपराक्रमे । कृतकृत्यो भविष्यामि विप्रवासितकल्मषः ।।2.74.34।।

इति नागैवारण्ये तोमराङ्कुशचोदितः । पपात भुवि सङ्क्रुद्धो निश्श्वसन्निव पन्नगः ।।2.74.35।।

संरक्तनेत्रः शिथिलाम्बरस्तथा विधूतसर्वाभरणः परन्तपः । बभूव भूमौ पतितो नृपात्मजः शचीपतेः केतुरिवोत्सवक्षये ।।2.74.36।।