Sarga 67: The Plight of a Kingless Land

नाराजके जनपदे शरान् सततमस्यताम् । श्रूयते तलनिर्घोष इष्वस्त्राणामुपासने ।।2.67.21।।

नाराजके जनपदे वणिजो दूरगामिनः । गच्छन्ति क्षेममध्वानं बहुपण्यसमाचिताः ।।2.67.22।।

नाराजके जनपदे चरत्येकचरः वशी । भावयन्नात्मनात्मानं यत्र सायङ्गृहो मुनिः ।।2.67.23।।

नाराजके जनपदे योगक्षेमं प्रवर्तते । नचाप्यराजके सेना शत्रून् विषहते युधि ।।2.67.24।।

नाराजके जनपदे हृष्टैः परमवाजिभिः । नराः सम्यान्ति सहसा रथैश्च परिमण्डिताः ।।2.67.25।।

नाराजके जनपदे नराः शास्त्रविशारदाः । संवदन्तोऽवतिष्ठन्ते वनेषूपवनेषु च ।।2.67.26।।

नाराजके जनपदे माल्यमोदकदक्षिणाः । देवताभ्यर्चनार्थय कल्प्यन्ते नियतैर्जनैः ।।2.67.27।।

नाराजके जनपदे चन्दनागुरुरूषिताः । राजपुत्रा विराजन्ते वसन्त इव शाखिनः ।।2.67.28।।

यथा ह्यनुदका नद्यो यथा वाऽप्यतृणं वनम् । अगोपाला यथा गावस्तथा राष्ट्रमराजकम् ।।2.67.29।।

ध्वजो रथस्य प्रज्ञानं धूमो ज्ञानं विभावसोः । तेषां यो नो ध्वजो राज स देवत्वमितो गतः ।।2.67.30।।