Sarga 26: Sītā Asked to Stay

राज्ञा सत्यप्रतिज्ञेन पित्रा दशरथेन मे। कैकेय्यै मम मात्रे तु पुरा दत्तो महावरौ ।।2.26.21।।

तयाऽद्य मम सज्जेऽस्मिन्नभिषेके नृपोद्यते। प्रचोदितः ससमयो धर्मेण प्रतिनिर्जितः ।।2.26.22।।

चतुर्दश हि वर्षाणि वस्तव्यं दण्डके मया। पित्रा मे भरतश्चापि यौवराज्ये नियोजितः ।।2.26.23।।

सोऽहं त्वामागतो द्रष्टुं प्रस्थितो विजनं वनम्। भरतस्य समीपे ते नाहं कथ्यः कदाचन ।।2.26.24।।

ऋद्धियुक्ता हि पुरुषा न सहन्ते परस्तवम्। तस्मान्न ते गुणाः कथ्या भरतस्याग्रतो मम ।।2.26.25।।

नापि त्वं तेन भर्तव्या विशेषेण कदाचन। अनुकूलतया शक्यं समीपे तस्य वर्तितुम् ।।2.26.26।।

तस्मै दत्तं नृपतिना यौवराज्यं सनातनम्। स प्रसाद्यस्त्वया सिते नृपतिश्च विशेषतः ।।2.26.27।।

अहं चापि प्रतिज्ञां तां गुरोः समनुपालयन्। वनमद्यैव यास्यामि स्थिरा भव मनस्विनी ।।2.26.28।।

याते च मयि कल्याणि वनं मुनिनिषेवितम्। व्रतोपवासपरया भवितव्यं त्वयानघे ।।2.26.29।।

काल्यमुत्थाय देवानां कृत्वा पूजां यथाविधि। वन्दितव्यो दशरथः पिता मम नरेश्वरः ।।2.26.30।।