Sarga 25: A Mother's Blessing for the Journey

मा च त्वां हिंसिषुः पुत्र मया सम्पूजितास्त्विह। आगमास्ते शिवाः सन्तु सिद्ध्यन्तु च पराक्रमाः ।।2.25.21।।

सर्वसम्पत्तये राम स्वस्तिमान्गच्छ पुत्रक। स्वस्ति तेऽस्त्वान्तरिक्षेभ्यः पार्थिवेभ्यः पुनः पुनः ।।2.25.22।।

सर्वेभ्यश्चैव देवेभ्यो ये च ते परिपन्थिनः। शुक्रः सोमश्च सूर्यश्च धनदोऽथ यमस्तथा ।।2.25.23।।

पान्तु त्वामर्चिता राम दण्डकारण्यवासिनम्। अग्निर्वायुस्तथा धूमो मन्त्राश्चर्षिमुखाच्च्युताः ।।2.25.24।।

उपस्पर्शनकाले तु पान्तु त्वां रघुनन्दन। सर्वलोकप्रभुर्ब्रह्मा भूतभर्ता तथर्षयः ।।2.25.25।।

ये च शेषाः सुरास्ते त्वां रक्षन्तु वनवासिनम्। इति माल्यैः सुरगणान्गन्धैश्चापि यशस्विनी ।।2.25.26।।

स्तुतिभिश्चानुरूपाभिरानर्चायतलोचना। ज्वलनं समुपादाय ब्राह्मणेन महात्मना ।।2.25.27।।

हावयामास विधिना राममङ्गलकारणात्। घृतं श्वेतानि माल्यानि समिधः श्वेतसर्षपान् ।।2.25.28।।

उपसम्पादयामास कौसल्या परमाङ्गना। उपाध्यायः स विधिना हुत्वा शान्तिमनामयम् ।।2.25.29।।

हुतहव्यावशेषेण बाह्यं बलिमकल्पयत्। मधुदध्यक्षतघृतैः स्वस्तिवाच्य द्विजांस्ततः ।।2.25.30।।