Sarga 32: Wealth Given Away

इत्युक्तः स हि रामेण सुयज्ञः प्रतिगृह्य तत्। रामलक्ष्मणसीतानां प्रयुयोजाऽशिषः शुभाः ।।2.32.11।।

अथ भ्रातरमव्यग्रं प्रियं रामः प्रियंवदः। सौमित्रिं तमुवाचेदं ब्रह्मेव त्रिदशेश्वरम् ।।2.32.12।।

अगस्त्यं कौशिकं चैव तावुभौ ब्राह्मणोत्तमौ। अर्चयाहूय सौमित्रे रत्नैः सस्यमिवाम्बुभिः ।।2.32.13।।

तर्पयस्व महाबाहो गोसहस्रैश्च मानद। सुवर्णै रजतैश्चैव मणिभिश्च महाधनैः ।।2.32.14।।

कौसल्यां च सुमित्रां च भक्तः पर्युपतिष्ठति। आचार्यस्तैत्तिरीयाणामभिरूपश्च वेदवित् ।।2.32.15।।

तस्य यानं च दासीश्च सौमित्रे सम्प्रदापय। कौशेयानि च वस्त्राणि यावत्तुष्यति स द्विजः ।।2.32.16।।

सूतश्चित्ररथश्चार्यः सचिवः सुचिरोसितः। तोषयैनं महार्हैश्च रत्नैर्वस्त्रैर्धनैस्तथा ।।2.32.17।।

पशुकाभिश्च सर्वाभिर्गवां दशशतेन च। ये चेमे कठकालापा बहवो दण्डमाणवाः ।।2.32.18।।

नित्यस्वाध्यायशीलत्वान्नान्यत्कुर्वन्ति किञ्चन। अलसाः स्वादुकामाश्च महतां चापि सम्मताः ।।2.32.19।।

तेषामशीतियानानि रत्नपूर्णानि दापय। शालिवाहसहस्रं च द्वे शते भद्रकांस्तथा ।।2.32.20।।