Sarga 71: Arrival at Ayodhyā

तोरणं दक्षिणार्धेन जम्बूप्रस्थमुपागमत् । वरूथं च ययौ रम्यं ग्रामं दशरथात्मजः ।।2.71.11।।

तत्र रम्ये वने वासं कृत्वाऽसौ प्राङ्मुखो ययौ । उद्यानमुज्जिहानायाः प्रियका यत्र पादपाः ।।2.71.12।।

सालांस्तु प्रियकान्प्राप्य शीघ्रानास्थाय वाजिनः । अनुज्ञाप्याथ भरतः वाहिनीं त्वरितः ययौ ।।2.71.13।।

वासं कृत्वा सर्वतीर्थे तीर्त्वा चोत्तानकां नदीम् । अन्या नदीश्च विविधाः पार्वतीयैस्तुरङ्गमैः ।।2.71.14।।

हस्तिपृष्ठकमासाद्य कुटिकामत्यवर्तत । ततार च नरव्याघ्रः लौहित्ये स कपीवतीम् ।।2.71.15।।

व्यपायाद्राघवस्तूर्णं तीर्त्वा शोणां महानदीम् ।।2.71.16।।

एकसाले स्थाणुमतीं विनते गोमतीं नदीम् । कलिङ्गनगरे चापि प्राप्य सालवनं तदा ।।2.71.17।।

भरतः क्षिप्रमागच्छत् सुपरिश्रान्तवाहनः । वनं च समतीत्याशु शर्वर्यामरुणोदये ।।2.71.18।।

अयोध्यां मनुना राज्ञा निर्मितां सन्ददर्श ह । तां पुरीं पुरुषव्याघ्रः सप्तरात्रोषितः पथि ।।2.71.19।।

अयोध्यामग्रतर्दृष्ट्वा सारथिं वाक्यमब्रवीत् । एषा नातिप्रतीता मे पुण्योद्याना यशस्विनी ।।2.71.20।।