Sarga 3: Counsel to the Son

तस्मात्त्वं पुष्ययोगेन यौवराज्यमवाप्नुहि। कामतस्त्वं प्रकृत्यैव विनीतो गुणवानसि ।।2.3.41।।

गुणवत्यपि तु स्नेहात्पुत्र वक्ष्यामि ते हितम्। भूयो विनयमास्थाय भव नित्यं जितेन्द्रियः ।।2.3.42।।

कामक्रोधसमुत्थानि त्यजेथा व्यसनानि च। परोक्षया वर्तमानो वृत्त्या प्रत्यक्षया तथा ।।2.3.43।।

अमात्यप्रभृतीः सर्वाः प्रकृतीश्चानुरञ्जय। कोष्ठागारायुधागारैः कृत्वा सन्निचयान्बहून् ।।2.3.44।।

तुष्टानुरक्तप्रकृतिर्यः पालयति मेदिनीम्। तस्य नन्दन्ति मित्राणि लब्ध्वाऽमृतमिवामराः ।।2.3.45।।

तस्मात्पुत्र त्वमात्मानं नियम्यैवं समाचर। तच्छ्रुत्वा सुहृदस्तस्य रामस्य प्रियकारिणः ।।2.3.46।।

त्वरिताः शीघ्रमभ्येत्य कौसल्यायै न्यवेदयन्। सा हिरण्यं च गाश्चैव रत्नानि विविधानि च ।।2.3.47।।

व्यादिदेश प्रियाख्येभ्यः कौसल्या प्रमदोत्तमा। अथाऽभिवाद्य राजानं रथमारुह्य राघवः। ययौ स्वं द्युतिमद्वेश्म जनौघैः प्रतिपूजितः ।।2.3.48।।

ते चापि पौरा नृपतेर्वचस्तच्छ्रुत्वा तदा लाभमिवेष्टमाशु। नरेन्द्रमामन्त्र्य गृहाणि गत्वा देवान्समानर्चुरभिप्रहृष्टाः ।।2.3.49।।