Sarga 3: Counsel to the Son

पितुः समीपं गच्छन्तं प्राञ्जलिः पृष्ठतोऽन्वगात्। स तं कैलासशृङ्गाभं प्रासादं नरपुङ्गवः ।।2.3.31।।

आरुरोह नृपं द्रष्टुं सह सूतेन राघवः। स प्राञ्जलिरभिप्रेत्य प्रणतः पितुरन्तिके ।।2.3.32।।

नाम स्वं श्रावयन्रामो ववन्दे चरणौ पितुः। तं दृष्ट्वा प्रणतं पार्श्वे कृताञ्जलिपुटं नृपः ।।2.3.33।।

गृह्याञ्जलौ समाकृष्य सस्वजे प्रियमात्मजम्। तस्मै चाभ्युदितं सम्यंमणिकाञ्चनभूषितम् ।।2.3.34।।

दिदेश राजा रुचिरं रामाय परमासनम्। तदासनवरं प्राप्य व्यदीपयत राघवः ।।2.3.35।।

स्वयैव प्रभया मेरुमुदये विमलो रविः। तेन विभ्राजता तत्र सा सभाऽभिव्यरोचत ।।2.3.36।।

विमलग्रहनक्षत्रा शारदी द्यौरिवेन्दुना। तं पश्यमानो नृपतिस्तुतोष प्रियमात्मजम् ।।2.3.37।।

अलंकृतमिवात्मानमादर्शतलसंस्थितम्। स तं सस्मितमाभाष्य पुत्रं पुत्रवतां वरः ।।2.3.38।।

उवाचेदं वचो राजा देवेन्द्रमिव कश्यपः। ज्येष्ठायामसि मे पत्न्यां सदृश्यां सदृशः सुतः ।।2.3.39।।

उत्पन्नस्त्वं गुणश्रेष्ठो मम रामात्मजः प्रियः। त्वया यतः प्रजाश्चेमाः स्वगुणैरनुरञ्जिताः ।।2.3.40।।