Sarga 15: Sumantra Sent for Rāma

अभिषेचनसम्युक्ताः सर्वलोकस्य हृष्टवत्। ततो ददर्श रुचिरं कैलासशिखरप्रभम् ।।2.15.31।।

रामवेश्म सुमन्त्रस्तु शक्रवेश्मसमप्रभम्। महाकवाटविहितं वितर्दिशतशोभितम् ।।2.15.32।।

काञ्चनप्रतिमैकाग्रं मणिविद्रुमशोभितम्। शारदाभ्रघनप्रख्यं दीप्तं मेरुगुहोपमम् ।।2.15.33।।

मणिभिर्वरमाल्यानां सुमहद्भिरलङ्कृतम्। मुक्तामणिभिराकीर्णं चन्दनागरुधूपितम् ।।2.15.34।।

गन्धान्मनोज्ञान्विसृजद्दार्दुरं शिखरं यथा। सारसैश्च मयूरैश्च निनदद्भिर्विराजितम् ।।2.15.35।।

सुकृतेहामृगाकीर्णं सुकीर्णं भित्तिभिस्तथा। मनश्चक्षुश्च भूतानामाददत्तिग्मतेजसा ।।2.15.36।।

चन्द्रभास्करसङ्काशं कुबेरभवनोपमम्। महेन्द्रधामप्रतिमं नानापक्षिसमाकुलम् ।।2.15.37।।

मेरुशृङ्गसमं सूतो रामवेश्म ददर्श ह। उपस्थितैः समाकीर्णं जनैरञ्जलिकारिभिः ।।2.15.38।।

उपादाय समाक्रान्तैस्तथा जानपदैर्जनैः। रामाभिषेकसुमुखैरुन्मुखैः समलङ्कृतम् ।।2.15.39।।

महामेघसमप्रख्यमुदग्रं सुविभूषितम्। नानारत्नसमाकीर्णं कुब्जकैरातकावृतम् ।।2.15.40।।