Sarga 50: Meeting with Guha

मध्येन मुदितं स्फीतं रम्योद्यानसमाकुलम् । राज्यं भोग्यं नरेन्द्राणां ययौ धृतिमतांवरः ।।2.50.11।।

तत्र त्रिपथगां दिव्यां शिव तोयामशैवलाम् । ददर्श राघवो गङ्गां पुण्यामृषिनिसेविताम् ।।2.50.12।।

आश्रमैरविदूरस्थैः श्रीमद्भिः समलङ्कृताम् । कालेऽप्सरोभिर्हृष्टाभिः सेविताम्भोह्रदां शिवाम् ।।2.50.13।।

देवदानवगन्धर्वैः किन्नरैरुपशोभिताम् । नागगन्धर्वपत्नीभिः सेवितां सततं शिवाम् ।।2.50.14।।

देवाक्रीडशताकीर्णां देवोद्यानशतायुताम् । देवार्थमाकाशगमां विख्यातां देवपद्मिनीम् ।।2.50.15।।

जलघाताट्टहासोग्रां फेननिर्मलहासिनीम् । क्वचिद्वेणीकृतजलां क्वचिदावर्तशोभिताम् ।।2.50.16।।

क्वचित्स्तिमितगम्भीरां क्वचिद्वेगजलाकुलाम् । क्वचिद्गम्भीरनिर्घोषां क्वचिद्भैरवनिस्वनाम् ।।2.50.17।।

देवसङ्घाप्लुतजलां निर्मलोत्पलशोभिताम् । क्वचिदाभोगपुलिनां क्वचिन्निर्मलवालुकाम् ।।2.50.18।।

हंससारससङ्घुष्टां चक्रवाकोपकूजिताम् । सदा मत्तैश्च विहगैरभिसन्नादितान्तराम् ।।2.50.19।।

क्वचित्तीररुहैर्वृक्षैर्मालाभिरिव शोभिताम् । क्वचित्फुल्लोत्पलच्छन्नां क्वचित्पद्मवनाकुलाम् ।।2.50.20।।