Sarga 12: Daśaratha Tries to Turn Kaikeyī

दुःखान्यसहती देवी मामेवानुमरिष्यति। कौसल्यां च सुमित्रां च मां च पुत्रैस्त्रिभिः सह ।।2.12.91।।

प्रक्षिप्य नरके सा त्वं कैकेयि सुखिता भव। मया रामेण च त्यक्तं शाश्वतं सत्कृतं गुणैः ।।2.12.92।।

इक्ष्वाकुकुलमक्षोभ्यमाकुलं पालयिष्यसि। प्रियं चेद्भरतस्यैतद्रामप्रव्राजनं भवेत् ।।2.12.93।।

मा स्म मे भरतः कार्षीत्प्रेतकृत्यं गतायुषः। हन्तानार्ये ममामित्रे सकामा भव कैकयि ।।2.12.94।।

मृते मयि गते रामे वनं पुरुषपुङ्गवे। सेदानीं विधवा राज्यं सपुत्रा कारयिष्यसि ।।2.12.95।।

त्वं राजपुत्रीवादेन न्यवसो मम वेश्मनि। अकीर्तिश्चातुला लोके ध्रुवः परिभवश्च मे ।।2.12.96।।

सर्वभूतेषु चावज्ञा यथा पापकृतस्तथा। कथं रथैर्विभुर्यात्वा गजाश्वैश्च मुहुर्मुहुः ।।2.12.97।।

पद्भ्यां रामो महारण्ये वत्सो मे विचरिष्यति। यस्य त्वाहारसमये सूदाः कुण्डलधारिणः ।।2.12.98।।

अहंपुर्वाः पचन्ति स्म प्रशस्तं पानभोजनम्। स कथं नु कषायाणि तिक्तानि कटुकानि च ।।2.12.99।।

भक्षयन्वन्यमाहारं सुतो मे वर्तयिष्यति। महार्हवस्त्रसंवीतो भूत्वा चिरसुखोषितः ।।2.12.100।।