Sarga 12: Daśaratha Tries to Turn Kaikeyī

किं नु दुःखमलीकं वा मयि रामे च पश्यसि। न कथञ्चिदृते रामाद्भरतो राज्यमावसेत् ।।2.12.61।।

रामादपि हितं मन्ये धर्मतो बलवत्तरम्। कथं द्रक्ष्यामि रामस्य वनं गच्छेति भाषिते ।।2.12.62।।

मुखवर्णं विवर्णं तं यथैवेन्दुमुपप्लुतम्। तां हि मे सुकृतां बुद्धिं सुहृद्भिः सह निश्चिताम् ।।2.12.63।।

कथं द्रक्ष्याम्यपावृत्तां परैरिव हतां चमूम्। किं मां वक्ष्यन्ति राजानो नानादिग्भ्यः समागताः ।।2.12.64।।

बालो बतायमैक्ष्वाकश्चिरं राज्यमकारयत्। यदा तु बहवो वृद्धाः गुणवन्तो बहुश्रुताः ।।2.12.65।।

परिप्रक्ष्यन्ति काकुत्स्थं वक्ष्यामि किमहं तदा। कैकेय्या क्लिश्यमानेन रामः प्रव्राजितो मया ।।2.12.66।।

यदि सत्यं ब्रवीम्येतत्तदसत्यं भविष्यति। किं मां वक्ष्यति कौसल्या राघवे वनमास्थिते ।।2.12.67।।

किं चैनां प्रतिवक्ष्यामि कृत्वा विप्रियमीदृशम्। यदा यदा हि कौसल्या दासीवच्च सखीव च ।।2.12.68।।

भार्यावद्भगिनीवच्च मातृवच्चोपतिष्ठति। सततं प्रियकामा मे प्रियपुत्रा प्रियंवदा ।।2.12.69।।

न मया सत्कृता देवि सत्कारार्हा कृते तव। इदानीं तत्तपति मां यन्मया सुकृतं त्वयि ।।2.12.70।।